Haseup Teu Welĕh Ngelun

Karya : Yus Rusyana

Nyeueung haseup nu teu welěh ngelun
tina corobong pabrik tinun
naha anggur ngungun
kapan urang keur ngawangun
něnjo sawah nu ngupluk-ngaplak
anu nungtut disaeuran ku barangkal
naha makě nyeblak
kapan galengan gě diaspal

Nyawang gunung nu ngalamuk
horěng rurud bulistir
naha kudu ngaheruk
kapan untungna geus kakeruk

Kunaon atuh tibelat
ka sawah nu hějo ngěmploh
ka gunung nu ngalanglayung
ka leuweung anu geueumeun
da ěta mah geus kaliwat

Lain nieneung pědah euweuh
nineung sotěh kanu heueuh
nu hirup bari huripna
aringgis kari urutna

(dicutat tina buku Saratus Sajak Sunda, Abdullah Mustappa, 1992)

(Diserat deui ku : Ellyana Syafitri, murid SMA Kosgoro Kota Bogor, tina Sabasa pikeun murid kelas VIII semester 1 : Pangajaran Basa Sunda pikeun murid SMP di kota Bogor, jilid 8b,Drs. Ahmad Hadi, Pamulang : Tangerang, 2008, kaca : 20)